點揀 Party Room？Book 場前要檢查嘅 8 樣嘢

揀 Party Room 唔好淨係睇相同價錢。Book 場前最少要檢查八樣嘢：人數上限、洗手間、升降機、音量守則、食物同酒精規矩、入場方法、取消政策同評價。喺Gatherland填好日期、時間、時長同人數，就會篩走唔啱人數嘅場地，並顯示嗰個時段嘅總價；其餘幾項就要睇場地頁或者 message 場主。

1. 人數：坐唔坐得落？

每個場地有人數範圍。搜尋時填準人數，太細或太大嘅場地會自動篩走。要留意：

• 按人頭收費嘅場地可能有最低人數，人少過都按最低人數計
• 唔好超出最多人數，就算擠得落都唔應該
• 相片未必睇得出實際大細，有疑問就問場主

按人數搵場可以由 10 人 Party Room 開始睇。

2. 洗手間：獨立定共用？

派對幾個鐘，洗手間好重要。有獨立洗手間嘅場地唔使出去同其他單位共用，有小朋友或者通宵場就更加方便。共用洗手間喺走廊嘅話，問清楚使唔使鎖匙或者密碼，夜晚有冇燈。

3. 交通同升降機

有長者、小朋友、BB 車，或者要搬大量食物同佈置，問清楚有冇升降機直達。亦可以按地區揀，例如觀塘或者旺角，方便大家到。

唔少 Party Room 喺工廈，要留意：

• 升降機數量少，放工時間同週末夜晚可能要等
• 有啲大廈分客用同貨用升降機，夜晚可能只開其中一部
• 夜晚大堂未必有保安，入大廈可能要另一個密碼或者拍卡
• 由港鐵站行過去要幾耐，可以問場主最近嘅出口

4. 音量同時間守則

好多場地有音量要求，尤其係夜晚。唱 K 或者玩到夜，book 之前問清楚：

• 幾點之後要收細聲
• 最遲幾點要離場
• 可唔可以通宵

5. 食物同酒精

• 可唔可以自攜食物同叫外賣
• 有冇雪櫃、微波爐或者廚房
• 可唔可以自攜酒精飲品
• 有冇加購項目，例如 BBQ 食物套餐

叫外賣嘅話，喺訂單寫清楚大廈、樓層同單位，或者約好落樓接，工廈夜晚未必人人入得到。

6. 入場方法

類型	點入場	幾時 book
自助入場	開場前用電郵同 WhatsApp 收入場資料，例如門鎖密碼	一般最遲開場前 30 分鐘
有職員駐場	職員接待	大約要兩個鐘前

確實樓層同單位會喺確認預訂後顯示。

7. 取消政策

每個場地用以下其中一種取消政策：

政策	全數退款	退一半	不退款
彈性	開場前 24 小時或以上	開場前 6 至 24 小時	少於 6 小時
標準	開場前 48 小時或以上	開場前 24 至 48 小時	少於 24 小時
嚴格	開場前 7 日或以上	開場前 72 小時至 7 日	少於 72 小時

按金取消時一定全數退還。人數或者日期未定，揀彈性政策會穩陣啲。詳情睇取消政策。

8. 評價

Gatherland只有完成預訂嘅客人先可以寫評價，每次預訂一次，包括整體評分同清潔、性價比、位置、設施四項分數。睇評價時可以特別留意同你需要有關嘅分項，例如重視乾淨就睇清潔分。

睇評價時，留意場主點回覆負評：有冇具體講改善咗咩，比一兩個高分更有參考價值。

有評分嘅 Party Room

預訂方式有咩分別？

• 即時確認：付款成功即確認
• 場主確認：場主有 24 小時決定，期間時段會保留，拒絕就唔收錢

預訂時要網上付清全數，平台保管款項，到預訂完結後 48 小時先發放俾場主。Gatherland唔收訂場手續費。

Message 場主可以點問？

Book 場前檢查清單

1. 人數喺場地範圍內
2. 洗手間同升降機符合需要
3. 問清楚音量同離場時間
4. 確認食物、酒精同佈置規矩
5. 知道點入場、幾時收到入場資料
6. 睇清楚取消政策同按金
7. 睇過評價同分項分數
8. 用 Party checklist 準備其他嘢

如果去到唔符描述？

如果場地嚴重唔符描述，要喺開場後 24 小時內通知平台。平台會處理爭議，可能部分或者全數退款。詳情睇信任及安全。

價錢方面嘅問題，可以睇 Party Room 收費攻略。