點樣填滿平日時段？折扣、即時確認同啱平日嘅客群

平日時段要填滿，靠四樣嘢：平台限定嘅平日折扣、即時確認、較短嘅預訂通知時間，同埋針對平日客群嘅設施同介紹。公司活動、工作坊、排練、拍攝同細團體聚會，都係平日常見嘅預訂。

平日係邊幾日？

星期五至日、公眾假期同公眾假期前一日都按週末價計。所以平日即係星期一至四，唔包公眾假期同假期前一日。呢幾日先係你要主動爭取嘅時段。

價錢同方便，兩類方法點揀？

兩類可以一齊用。如果你唔想減價，可以先由方便方法入手：好多平日客最在意嘅係即刻訂到、即刻確認。

用價錢吸引平日客

平日折扣

你可以設平台限定嘅平日折扣，系統會自動套用喺平日時段。客人搜尋時見到嘅總價已經計咗折扣，比較時一眼睇到。

優惠標語

喺場地頁加一句平台限定優惠標語，話俾客人知喺Gatherland訂有咩著數。寫得具體啲，例如講明適用邊啲日子。

時段價

日間通常比夜晚少人訂。可以將平日日間設成較低嘅時段價，吸引工作坊、拍攝同排練。

降低門檻

• 平日最少鐘數設低啲，接到短時間預訂。
• 團體折扣可以吸引公司同學校團體。

定價詳情可以睇 點樣幫場地定價。

用方便度吸引平日客

開即時確認

平日好多預訂都係臨時決定。即時確認嘅場地，客人付款成功就即刻確認，唔使等場主覆。開之前確保日曆準確，其他渠道嘅預訂已經同步或者手動封鎖。

縮短預訂通知時間

自助入場嘅場地，客人通常最遲可以喺開始前 30 分鐘訂；有職員當值嘅場地一般要預早大約兩個鐘。如果你可以接受短通知，就唔好設得太長。

快啲回覆

• 盡快回覆查詢同預訂請求。場主確認嘅場地有 24 小時答覆，但越快越好。
• 留意「出價搵場」嘅請求，客人會講低日期、人數同預算，你可以直接回覆報價。

回覆「出價搵場」同查詢嘅範本

客人要嘅係一個可以即刻決定嘅答覆。按以下次序寫：

邊類客人平日最多？

場合	佢哋睇重咩	介紹同相片要顯示
團隊活動、公司聚會	夠位、投影、方便交通	成個空間嘅闊角相、投影位置、由港鐵站點行
工作坊、開班	枱櫈、白板、投影	枱櫈排法、白板、可以坐幾多人
排舞、夾 Band	鏡牆、器材、隔音	鏡牆全長、器材型號、隔音安排
拍攝、直播	自然光、無縫牆、Wi-Fi	日間自然光相、背景牆、Wi-Fi
細團體聚會、打麻雀	麻雀枱、遊戲機、即時確認	麻雀枱類型、遊戲機型號、即時確認

如果你嘅場地有呢啲設施，記得喺設施列表剔選並寫細節，客人篩選時先搵到你。介紹點寫可以睇 寫一個會成交嘅場地介紹。

一次過設定好平日

定期檢討成效

逐少調整、持續觀察，通常比一次過大減價更有效。每次只改一兩樣，先知道邊樣有用。

保持日曆準確

日曆唔準，客人訂唔到或者撞場，都會影響評價。用手動封鎖同 iCal 同步保持日曆最新，詳情睇 用 iCal 同步日曆。